LES HORES MUERTES
(Lletra de Mánfer de la Llera)
Yo quixere plumiar un poema
pa enllenar eses hores vacíes,
eses hores de murnia tardiega
que son hores dafechu perdíes.
Yo quixere esborriar d’eses hores,
d’eses hores que son hores muertes,
el sopor de la tarde qu’invade
de la casa per dientru l’ambiente.
Yo quixere emplegar eses hores,
eses hores sin plizca de vida,
en daqué qu’enllenare l’espaciu
ocupáu por un tediu qu’asfixa.
Yo quixere allegrar eses hores,
que son hores igual que solombres,
con poemes d’amor y tenrura
y canciar a la paz de los homes.
Yo quixere poner a eses hores,
a eses hores tan atristayaes,
una música dulce, amorosa,
coles notes d’espluma bordaes.
Y entós yá’l inconsciente ocupáu
con daqué que ximielgue’l pigazu,
les tardes serondieques d’ochobre
nun serán eses hores d’anguaño.
